المصري الحزين

المصري الحزين .

على قد مالمصريين فرحو وهللوا يوم 30 يونيو .. على قد ماهم دلوقتي مكتئبين ومحبطين وخائب املهم ..

كل الناس بتتكلم بحزن ومخنوقة بدموعها .. كل الكتابات مليانة وجع  وصريخ والم مالوش وصف ..

الاغلبية شايفين بكرة اسود من سواد الكحل .. حتى اكتر المتفائلين الي عرفتهم في حياتي بقوا بيتكلموا بتشاؤم مؤلم ..

وحقيقي مش عارفة احنا اللي بقينا متشائمين ولا الواقع هو اللي مش مبشر ..

 انا في حالة اكتئاب حاد .. 

ليه بقى !

ليه بقى ! 

طول الوقت ببص على احوال الناس في مصر وافكر في طريقة عيشيتهم .. وكل مابختلط بالناس اكتر واشوف طريقة الحياة اللي عايشينها بيصعب علينا ناس كتير اوي .. واكتر حد بيصعب عليا الناس اللي زانقة نفسها في زقاق العادات والتقاليد والمألوف .. الناس اللي مضيقة الدنيا على نفسها وكاتمة نفسها وخايفة تعمل اي حاجة جديدة او مختلفة او مجنونة في حياتها عشان خايفين من نظرة المجتمع ليهم , مع انهم لو فكروا شوية هيلاقوا ان الدنيا عمرها ماكانت هتوصل للتطور اللي احنا فيه النهاردة لولا الناس المجنونة والمختلفة واللي بتفكر برا الصندوق ..

بقالي كام يوم الفكرة دي مسيطرة عليا .. بفكر في الناس اللي مش قادرين يعيشوا في براح الدنيا وخانقين نفسهم في زواية ومش عارفين يطلعوا منها ولاعايزين حد يدخل لهم فيها ..

الناس اللي الحياة بالنسبة لهم اتجاه واحد بس .. يااما شغل يااما جواز وخلصت الدنيا على كدا .. ومش قادرين يشوفوا بقية الحاجات المميزة الي في الدنيا ..

 نفسي اسألهم : ليه تقصر نفسك على حياة واحدة لما انت بامكانك تعيش اكتر من حياة؟؟ .. ليه تعرف نوع واحد من البشر لما بامكانك تنفتح على كل الثقافات والافكار والمعتقدات والجنسيات ؟ ( ومش عارفة ليه كمصريين عندنا عقدة الجنسية دي , احنا عنصريين اوي بطبعنا على فكرة .. نادرا لما تلاقي حد مصري له أصحاب من جنسيات تانية ) ..

ليه تحصر نفسك في حاجة واحدة لما انت ممكن تحب وتتجوز وتشتغل وتسافر ويبقى عندك صحاب وتمارس هواياتك وتجرب كل فترة تعمل حاجة جديدة وفي نفس الوقت تبقى فاكر حق ربنا عليك وتبقى كسبت دنيتك واخرتك  ..

ليه احنا كمصريين دايما بنعشق الكآبة ؟؟ ليه خانقين نفسنا وكائبين نفسنا وكارهين حياتنا ؟؟ وعلى طول زهقانين وحاسيين بالملل من حياتنا ؟؟ ليه مابنعرفش نستمتع بالدنيا وفي نفس الوقت نعمل لأخرتنا ؟؟

ليه الحياة عندنا ياابيض يااسود ؟؟ ليه بنكره اننا نلون حياتنا بكل الالوان ؟؟ ليه بنخاف نضحك ونفرح ؟؟ ليه بنعمل في نفسنا كدا ياجدعان ؟؟ ليـــــه ؟؟

هنخسر ايه لما نعيش الدنيا بكل مافيها لما نجرب كل حاجة ونتعامل مع كل الناس ونتقبل كل الاختلافات بين البشر ؟؟

ليه رغم اننا عايشين في القرن 21 لسة بنفكر بطريقة اهالينا اللي عفا عليها الزمن ؟! ليه بنسيب نفسنا تحت رحمة خبراتهم وتجاربهم وننسى اننا لازم نصنع لنفسنا تجربتنا وخبرتنا الخاصة بينا ؟؟

ببقى هتشل لما الاقي ناس لسة اهلهم بيقرروا لهم مصيرهم وبيتحكموا في اختياراتهم ومستقبلهم .. انك ترضي اهلك , دا مايتنافاش مع انك يكون ليك قرارك ورأيك الخاص بيك .. اصل شخصية كل انسان زي البصمة حاجة فريدة من نوعها ولا عمرها بتتكرر ابدا , عشان كدا مش ممكن اللي ينفع مع غيري ينفع معايا لاني انا ليا احساسي وليا افكاري وقناعاتي ومبادئي  اللي استحالة حد هيفهمها ولا يستوعبها غيري .. وعشان كدا من الغباء ان اي حد يتوقع مني اني احتذي بتجربته لانها نجحت معاه او اتجنب تجربة فشلت مع غيري , لانه من الطبيعي ان اختلاف شخصياتنا هو اللي هيتحكم في نجاح او فشل تجاربنا ..

وبجد نفسي المعلومة دي توصل لأهالينا عشان يبطلوا النغمة المشروخة بتاعة ” انا اعرف مصلحتك اكتر منك ” , الخرافة اللي عاشت عليها اجيال من المصريين وادت الى فشلهم المستمر .. يابني ادمين مافيش حد يعرف مصلحة حد غير ( ربنا ) والشخص نفسه .. في كل قرار في حياتك اطلب مشورة ربنا واستفتي قلبك واعمل اللي انت شايفه صح ومناسب ” ليك “ , وحط تحت “ليك” دي ميلون خط .. اصل المناسب ليك معاناها ليك انت بس مش المناسب لاهلك ولا لمجتمعك ولا المناسب عشان كلام الناس .. طز وميت طز في كلام الناس , المثل الشعبي بيقول ” اللي بيشيل قربة مقطوعة بتنزل على دماغه لوحده ” يعني مافيش حد من الناس ممكن يوقف معاك لما تاخد قرار غلط , حتى لو كنت واخده عشان خاطرهم ..

خلاصة الكلام :

الحياة قصيرة وانت لازم تعيشها بكل حاجة فيها ولازم تستمتع فيها على قد ماتقدر بالزوق بقى ولا بالعافية لازم تستمتع ولازم تفرح حتى لو كنت هتخرج الفرح دا من تحت طقاطيق الأرض , ولازم تعيش تجربتك وحتى لو غلطت مليون مرة عــااادي جدا ايه يعني اما تغلط وتتعلم !!, وكل ماتتعلم هتجمد وهتبقى احسن وهتفهم الدنيا صح اكتر وتبقى عندك خبرة في الحياة اكتر , ولما ربنا يرزقك بأولاد هتبقى عارف ايه اللي المفروض يتقال في اغلب المواقف اللي هيمروا بيها في حياتهم وهتنصحهم لحد مايقدروا يوقفوا على رجليهم ويختاروا طريقهم ويصنعوا تجربتهم الخاصة بيهم ..

ياناس اتعلموا تعيشوا الدنيا والآخرة صح بقى

أزمة انوثة

أزمة انوثة ..

كبنات عايشين في مجتمع شرقي ذكوري , احنا مضطرين اننا نتعامل كرجالة طول الوقت من اول مابنصحى الصبح ونصطبح بوش اخواتنا الولاد الي لو ماتعاملناش معاهم معاملة الند هيتشطروا علينا وهيترسخ جواهم اعتقاد اننا الجواري اللي امهم جابتهم عشان يخدموا حضراتهم ..

وطبعا البنت لما تنزل الشارع لازم تبقى راجل رسمي , يالهوي مش بس راجل لا دي لازم تبقى عسكري شرطة والا هتدي فرصة لكل اشباه الرجالة ( الي هم بقوا تلات ارباع المجتمع للأسف ) انهم ينهشوا فيها في كل وقت وكل مكان وبمناسبة وبدون مناسبة ..

ويادين النبي على الوش الخشب اللي بتضطر تلبسه في الشغل ماهو اصل الرجل المصري العظيم معتقد ان اي بنت بتنزل من بيتها عشان تشتغل يبقى لازم وحتما نازلة تدور على عريس ومهما البنت حاولت تثبت نفسها في الشغل وتثبت للكل انها نازلة تشتغل عشان عايزة تعمل لنفسها اسم ومركز ومستقبل , بردو بيفضل المخ الشرقي متركب شمال وزي ماقال سعد زغلول ” مافيــــــش فـايــــــدة ” ..

الي حابة اوصله لرجالة مجتممعنا العظيم ان البنت الجدعة والجامدة واللي بميت راجل مابتبقاش مبسوطة ولا مرتاحة وهي بتمثل دور الراجل وبتستنى الفرصة الي تقلع فيها عباية الراجل وتلبس فيها مايوه الست وتعيش انوثتها بكل حرية ..

كلنا جوانا البنت اللي بتخاف من الصرصار , وبتصرخ بهيستريا لما تشوف واحدة صاحبتها في الشارع ماشفتهاش من زمان ( ولازم بقية الشعب يقف يتفرج عشان يعرف هي بتصرخ ليه وبعد مايفهم لازم يرزعهم شتيمتين ولا دعوتين من اياهم ) ..

وبتحب تلبس قصير وتحط ميكب وتدلع نفسها حتى لو هتعمل كدا في البيت بينها وبين نفسها , وبنتكسف على فكرة من الكلام القبيح اللي بنسمعه طول اليوم في الشارع والشغل , وبنرتعش من الخوف لما ايد راجل تقرب مننا حتى لو عملنا فيها سبع البرومبة وبان علينا اننا بميت راجل بس الحقيقة ان جوانا بنبقى همنوت من الخوف , وبنحس بسعادة عظيمة لما نتلم تلات ولا اربع بنات في زواية في الشغل ونقعد ننم ونتريق على كل الرجالة اللي في الشغل ونقطع فروتهم واحنا ميتين من الضحك , اهو نوع من التنفيس عن اللي جوانا بدل مانطق نموت ..

وكلنا نفسنا في راجل جنتل ييهتم بينا ويعاملنا باحترام ويحسسنا اننا ملكات مش شرط الي هنحبه لو عندي راجل واحد كدا في حياتي هبقى مبسوطة سواء كان اخويا ولا ابويا ولا جاري او مديري في الشغل او صديقي او حبيبي ايا كان صفته , الراجل الجنتل اللي ماشوفتش منه غير انتنين او تلاتة من يوم ماوعيت عالدنيا ( اولهم بابا الي خلاني طول ال 18 سنة الي عشتهم في السعودية معاه معتقدة ان كل الرجالة كدا وكانت صدمة عمري ياحرام لما نزلت مصر واكتشفت ان الي كدا قليلين اوي اوي اوي  ) .. الراجل الي بيفتح باب المطعم ويخلي البنت تعدي الاول ولازم يستناها لما تقعد هي الاول وطبعا يحاسب لها , ولما يشوفها شايلة حاجة يشيل منها ( مش يديها كتبه ويقولها ماتعملي لك شغلانة وتشيلي شوية ) , ولما تتصل بيه يكنسل عليها ويتصل هو ( مش لما هي تفتح عليه يقولها فتحي ليه انا كنت برن بس , يخربيت النتانة ياأخي !!!) ولما تكون مروحة لازم يوصلها ( مش يقولها يلا باي بقى اصل صحابي مستنيني !! يالهوووي على الندالة !! ) ..

من الاخر كدا احنا مش طالبين من الدنيا كتير . كل اللي عايزينه ان المجتمع يسيبنا في حالنا ويحترم انوثتنا ويدينا فرصة اننا نظهرها من غير ماينهش فينا او يكرهنا في اليوم الي اتولدنا فيه بنات , وان ماحدش يلوم اي بنت بتسترجل لان اكيد هي ماعملتش كدا بمزاجها هي مضطرة تبقى كدا عشان تعرف تعيش في المجتمع الشرقي .. وياريت والنبي الرجالة تبطل تتكلم باسمنا ويعملوا نفسهم خبراء في نفسياتنا وفي قضاينا ويتكلموا عننا وهم مفكرين نفسهم فاهمينا , لأنهم لو عاشوا عمر نوح عمرهم مايقدروا يفهموا احنا بنفكر ازاي ولا بنحس بايه ؟!! فياريت تعتقونا وتحترموا خصوصيتنا وتدونا فرصة نحبكم ونتعامل معاكم كويس عشان نرتاح ونريحكم ..

نخب البدايات الجديدة

نخب البدايات الجديدة ..

بعد كل فترة لخبطة ومشاكل وقلق بنبقى محتاجين بداية جديدة , بداية نلم بيها شتات حياتنا المتبعتر, ونفلتر بيها افكارنا , ونرتب بيها اولوياتنا واحلامنا من اول وجديد ..

وعلى قد ماموضوع البدايات الجديدة دا صعب ومتعب على قد ماهو ممتع لانه دايما مليان حماس وتفاؤل وطاقة ايجابية تخليك تشتغل عشان تخلي بكرة احسن من كل اللي فات ..

كل ماتلاقي حياتك بتقع منك وبتبدأ تسيب من بعضها لازم تقف مع نفسك وتصنع بداية جديدة عشان تنقل نفسك من حالة الاحباط والملل الي وصلتلها حياتك لحالة من النشاط والامل عشان تحقق كل احلامك واهدافك في الحياة ..

البداية الجديدة ممكن تكون قرار بتغيير بعض طباعك وتصرفاتك اللي انت مش راضي عنها واللي انت حاسس انها مأخرة تقدمك في الحياة , او ممكن تكون صداقات جديدة بتصنعها مع ناس بتفهمك وبتخليك تستمتع بصحبتهم وتبقى مبسوط اكتر كل ماتقابلهم , او ممكن تبقى شغلانة جديدة انت ماجربتش تشتغلها قبل كدا وحاسس انها ممكن تزيدك خبرة وتجربة هتستفيد منها جدا في حياتك بعد كدا , او ممكن تبقى علاقة حب جديدة تنسيك علاقتك القديمة الي لسة سايبة جرح جواك ومش قادر تتعافى من اثارها لحد دلوقتي ..

حاجات كتير اوي ممكن تبتدي بيها عشان تغير حياتك وتنقل نفسك لمرحلة جديدة توصلك للي بتحلم بيه من السعادة والنجاح ..

بالنسبة لي كانت بدايتي الجديدة اني قررت اربي سمكة .. يمكن تكون حاجة غريبة بس انا جبتها عشان كنت محتاجة اتعلم ازاي اتحمل المسؤلية , ومن ساعة مادخلت ” السمكة الاورنج “- زي مابنت اخويا جودي بتسميها – دخلت حياتي وانا بدأت اتغير في حاجات كتير ..

مش مهم تبدأ بإيه او تبدأ ازاي المهم انك تاخد قرار البداية الجديدة وتنفذه وتبدأ تستمتع بحياتك :)

بداية جديدة موفقة للجميع ان شاء الله